O ALCALDE REÚNESE CON VECIÑOS DE FRANZA PARA IMPULSAR A RECUPERACIÓN DA ESCOLA DO CRUCEIRO

O alcalde de Mugardos, Juan Domingo de Deus, mantivo recentemente unha reunión cos veciños da parroquia de Franza para abordar o deterioro da Escola do Cruceiro, un edificio de gran valor histórico e cultural construído por emigrantes mugardeses na Habana. O inmoble, que foi matriculado polo Arcebispado de Santiago no ano 2013, atópase nun avanzado estado de deterioro, o que xerou preocupación entre os residentes da zona.

Durante o encontro, os veciños expresaron o seu compromiso coa conservación do edificio e presentaron propostas para a súa rehabilitación e posta en valor. O alcalde mostrou o seu apoio á iniciativa e destacou a importancia de recuperar este patrimonio para as futuras xeracións.

A Escola do Cruceiro, inaugurada en 1927, foi financiada por emigrantes das parroquias de Mugardos asentados na Habana, como parte dun proxecto educativo impulsado pola Institución Escolar Franza-Seijo. O edificio, que funcionou como escola ata 1932, é un dos exemplos máis representativos das escolas indianas en Galicia. O Concello de Mugardos comprométese a seguir colaborando cos veciños e coas institucións pertinentes para atopar solucións que permitan a conservación e rehabilitación da Escola do Cruceiro, e a súa posterior integración no patrimonio cultural do municipio.