AS ENTRADAS PARA O MUSICAL GALLAECIA ALL STARS DO SÁBADO SERÁN LIMITADAS E PODEN RESERVARSE

A Concellería de Cultura informou hoxe de que xa están dispoñibles para a súa reserva as entradas do musical Gallaecia All Stars programado para o próximo sábado a partir das 22.00 horas no Casino Mugardés.

As persoas que desexen reservar a súa entrada, poden facelo chamando ou enviando un whatsapp ao teléfono 606 16 81 40. Unha vez feito e asegurada a súa praza, deberán recoller as entradas o sábado ás 21.30 horas no Casino.

A reserva de entrada non é obrigatoria, e aqueles que desexen asistir e non fagan a reserva previa, terán dispoñibles as entradas no propio Casino a partir das 21.30 horas e ata encher o aforo.

Esta limitación de aforo é unha máis das medidas adoptadas para a prevención da COVID, xa que desde o Concello, como organizador do evento, asegúrase a máxima limpeza e desinfección así como a adopción de medidas que permitan a ventilación do espazo. Obviamente, e como en todos os espazos abertos ao público, o uso de máscara facial e o mantemento da distancia de seguridade é obrigatorio en todo momento para o público asistente.

O musical dará comezo ás 22.00 horas e durante dúas horas ininterrompidas, Gallaecia Big Band interpretará sobre o escenario música de calidade, mesturada cunha historia de moito humor, nunha viaxe aos tempos das grandes Big Bands de forma amena e con escenas de humor.