O ACORDO ENTRE A XUNTA DE GALICIA E A FEGAMP REFORZA O FINANCIAMENTO DO SERVIZO DE AXUDA NO FOGAR EN MUGARDOS

O Concello de Mugardos valora positivamente o acordo alcanzado entre a Xunta de Galicia e a FEGAMP para mellorar o financiamento do Servizo de Axuda non Fogar (SAF), mediante o incremento da achega económica por cada hora de servizo, que pasa de 12 euros a 16 euros por hora. Este avance supón un paso importante para reforzar a calidade, a sustentabilidade e a estabilidade do servizo, que presta atención a persoas maiores, dependentes e en situación de vulnerabilidade no municipio.

Entre os principais efectos deste acordo, destacan a mellora das condicións laborais do persoal do SAF, a garantía da sustentabilidade económica do servizo e a posibilidade de manter ou ampliar o número de horas de atención ás persoas usuarias, respondendo así á crecente demanda social.

A concelleira de Benestar, Patricia Ruiz de Azcárate, subliñou que “este incremento no financiamento é unha noticia moi positiva, xa que permitirá dignificar as condicións do persoal do SAF e asegurar un servizo esencial para moitas familias de Mugardos”. A edil engadiu que “desde o Concello seguiremos traballando para que esta mellora tradúzase nunha atención máis estable, de maior calidade e adaptada ás necesidades reais das persoas usuarias”.

O Concello continuará colaborando coas administracións autonómicas e supramunicipais para reforzar as políticas sociais e garantir servizos públicos de calidade, especialmente no ámbito da atención á dependencia.