MUGARDOS AVANZA CARA Á FINALIZACIÓN DA FASE 7 DO ARRU COA REMISIÓN DA DOCUMENTACIÓN AO INSTITUTO GALEGO DE VIVENDA E SOLO

O Concello de Mugardos celebrou unha nova reunión da Comisión da área de Rexeneración e Renovación Urbana (ARRU) correspondente aos núcleos de Mugardos e O Seixo, centrada nos traballos da Fase 7 do programa.

Nesta sesión abordouse o informe-proposta de xustificación de axudas e a solicitude de cualificación definitiva ante o Instituto Galego de Vivenda e Chan (IGVS). Coa remisión desta documentación, o Concello continúa avanzando para finalizar o proceso administrativo e permitir que os veciños beneficiarios dispoñan dos fondos canto antes.

O alcalde e concelleiro de Urbanismo, Juan Domingo de Deus, destacou que “con este paso estamos xa na recta final da Fase 7, cumprindo cos prazos e traballando coa máxima dilixencia para que as axudas cheguen ás familias o máis rápido posible”. Sinalou ademais que “a comparación con convocatorias anteriores demostra un avance moi significativo: os tempos e procedementos melloraron de forma clara”.

Pola súa banda, a concelleira de Facenda, Ana Varela, lembrou que “a pesar de que practicamente ningún concello do tamaño de Mugardos xestiona fondos desta complexidade, logramos axilizar de maneira notable a tramitación, reforzando a capacidade administrativa e a coordinación entre departamentos”. Engadiu que este esforzo “pon de manifesto o compromiso municipal por mobilizar recursos que contribúan á rehabilitación e mellora dos núcleos urbanos”.

O Concello de Mugardos continuará traballando ata completar todas as fases do programa, mantendo o obxectivo de facilitar os investimentos en vivenda e favorecer a rexeneración urbana dos núcleos de Mugardos e O Seixo.